Kapa Haka Powhiri



Tōia mai i te waka

Ki te urunga, te waka

Ki te moenga, te waka

Ki te takotoranga i takoto ai te waka


Tōia mai ai ngā mātāwaka, ngā maunga whakahī me ngā awa whakatere kōrero ki runga ki Te Wharekura o Te Kaokaoroa o Pātetere i te Rāmere kātahi anō ka hori. Nō roto tonu i te ope whakaeke ko ngā kura haka, ko ngā whānau maha, ko ngā Kōhanga Reo, ko ngā rūruhi me ngā koroheke me te Whare Kāhui Ariki e tautoko mai nei, e whakatinana mai nei i te karanga o te rā. I rere ngā waha karanga, i horu ngā reo hakahaka, i whakarere hoki ngā reo korokī me ngā reo korohī kia tau pai ai ngā manuwhiri ki roto ki te kaupapa o Ngā Whakataetae Kapa Haka ā-Rohe Kura Tuatahi o Tainui Waka. Ka mutu ana te taha tapu o ngā mahi, ka ruku ki te taha noa, ki te taha hākari. Ko te hākari ki te hua o te manaaki i te ata, ko te hākari ki te haka o Tāne Rore i te ahiahi, kua pūnaunau te whataroa o Manaia!


E mihi kau ana ki ngā ringa hora nui i tō tātou kaupapa nei, ki ngā kura huhua o te rohe nei, tatū ki ngā tamariki mō rātou tonu tēnei pōwhiri. Kia tere hoki te kārohirohi ki ngā kura, tatū ki te Whare Kāhui Ariki e tau nei, ka mihi rā!