2021 Tainui Waka Kapa Haka Regional Winners

Muia te whare o Te Papanui e te ikapahi tāngata i karapinepine atu ki runga o Kirikiriroa mō ngā tātāwhāinga kapa haka o Tainui waka mō ngā kura tuarua. Kua rua tau tēnei kaupapa e noho tārewa ana, kua rua tau ngā reo waitī, ngā reo iere, ngā reo horetītī, horetātā e noho ngū ana. Nō te tuangahuru o ngā rā o Hongongoi hoki mai ai te tihe ki te ihu o ngā whakataetae kapa haka kura tuarua o Tainui waka.

Tekau mā toru ngā kapa, whakataetae mai, whakangahau mai, i tū ki te mura o te ahi. Ko te koromaki matua, kia whakatairangatia te tuakiri rongomaiwhiti o te kura kia Raukawa te tū, kia Māori te tū, kia taiea te tū. Ka mutu, ko te whāinga mātāmuri, kia whai wāhi ki ngā whakataetae ā motu ka tū ki Tāmaki Makaurau hei te tau 2022.

Nō te tau nei, whakatutukihia ai tētahi o ngā pae tawhiti, tētahi o ngā maruāpō nui kua roa e whakatāuteutengia ana e mātou, arā, kia eke ki te tāpuhipuhitanga o tēnei whakataetae. Ka mutu, i kitea rawatia te hua o te whakaheke mōtuhi, o te tōngakingaki kia eke ki te tautara o angitu, ki te keokeonga o kaupapa riwha.

Me pēwhea e kore ai e tuku i ngā mihi manahau ki ngā pia, ngā tauira, ngā tāura, ngā pūkenga, ngā wānanga, otirā, ngā ringa raupā me ngā ringa tōhau nui o tā tātou kaupapa. Ki konei whakataukītia ai ehara taku toa i te toa takitahi, engari taku toa i te toa takitini.


2021 Results


1st - Kaitataki Tane

1st - Kaitataki Wahine

1st - Kakahu

1st - Whakaeke 1st - Waiata-a-ringa

2nd - Haka 1st - Poi 1st - Whakawatea 1st - Mita o te Reo